ଟଙ୍କା ପାଇଁ ନ୍ୟୁଜିଲାଣ୍ଡର ହାତ ଛାଡ଼ି ଦେଲେ କେନ୍ ଓ୍ବିଲିୟମସନ
ନ୍ୟୁଜିଲାଣ୍ଡ ଜୁଲାଇ ୩୦ରୁ ଜିମ୍ବାୱେ ବିପକ୍ଷରେ ଦୁଇ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବ। ଏହି ଟେଷ୍ଟ ସିରିଜ ପାଇଁ ନ୍ୟୁଜିଲାଣ୍ଡ ତାର ଦଳ ଘୋଷଣା କରିଛି। ଦଳରେ ଅନେକ ଖେଳାଳିଙ୍କୁ ସାମିଲ କରାଯାଇଛି। କିନ୍ତୁ ଏହି ତାଲିକାରେ ଅଭିଜ୍ଞ ବ୍ୟାଟ୍ସମ୍ୟାନ କେନ ୱିଲିୟମସନଙ୍କ ନାମ ନାହିଁ। ସେ ନିଜକୁ ଟେଷ୍ଟ ସିରିଜରୁ ଦୂରେଇ ରଖିଛନ୍ତି। କେବଳ ଏତିକି ନୁହେଁ, ମାଇକେଲ ବ୍ରେସୱେଲ ମଧ୍ୟ ସମାନ ନିଷ୍ପତ୍ତି ନେଇଛନ୍ତି ଯେ ସେ ଏହି ସିରିଜରେ ଅଂଶଗ୍ରହଣ କରିବେ ନାହିଁ। ୱିଲିୟମସନଙ୍କ ବିଷୟରେ କହିବାକୁ ଗଲେ, ସେ ଟି୨୦ ବ୍ଲାଷ୍ଟରେ ମିଡିଲସେକ୍ସ ସହିତ ଏକ ଚୁକ୍ତି କରିଛନ୍ତି ଏବଂ ଏହା ପରେ ସେ ଦି ହଣ୍ଡରେଡ ଟୁର୍ଣ୍ଣାମେଣ୍ଟରେ ସେଲଣ୍ଡନ ସ୍ପିରିଟ ଦଳ ପାଇଁ ଖେଳିବେ। ବ୍ରେସୱେଲ ବିଷୟରେ କହିବାକୁ ଗଲେ, ସେ ନିଜକୁ ଅନୁପସ୍ଥିତ ରଖିଛନ୍ତି। ମାଇକେଲ ବ୍ରେସୱେଲ ବର୍ତ୍ତମାନ ମେଜର ଲିଗ କ୍ରିକେଟରେ ଅଂଶଗ୍ରହଣ କରୁଛନ୍ତି ଏବଂ ତା’ପରେ ସେ ଦି ହଣ୍ଡରେଡ ଟୁର୍ଣ୍ଣାମେଣ୍ଟରେ ସାଉଦର୍ଣ୍ଣ ବ୍ରେଭସ ପାଇଁ ଖେଳିବେ।
ନ୍ୟୁଜିଲାଣ୍ଡ ମୁଖ୍ୟ ପ୍ରଶିକ୍ଷକ ରବ ୱାଲ୍ଟର କହିଛନ୍ତି, ’ଆମେ କେନ ଏବଂ ବ୍ରେସୱେଲ୍ଙ୍କୁ ନ୍ୟୁଜିଲାଣ୍ଡ ଦଳରେ ଚାହୁଁଥିଲୁ। କିନ୍ତୁ ସେମାନେ ଏହି ଗସ୍ତ ବିଷୟରେ ନ୍ୟୁଜିଲାଣ୍ଡ କ୍ରିକେଟ ସହିତ କଥା ହୋଇସାରିଛନ୍ତି। ଏହି ଦୁଇ ଖେଳାଳି ନ ଖେଳିବା ଯୋଗୁ ଦଳ ନିଶ୍ଚିତ ଭାବରେ କିଛି ଅସୁବିଧାର ସମ୍ମୁଖୀନ ହେବ।’ ମ୍ୟାଟ ହେନରୀ, ମ୍ୟାଟ ଫିସର ଏବଂ ଜାକବ ଡଫିଙ୍କୁ ଦଳରେ ସ୍ଥାନ ମିଳିଛି। ମ୍ୟାଟ ଫିସରଙ୍କୁ ପ୍ରଥମ ଥର ପାଇଁ ନ୍ୟୁଜିଲାଣ୍ଡ ଟେଷ୍ଟ ଦଳରେ ସ୍ଥାନ ମିଳିଛି। ନ୍ୟୁଜିଲାଣ୍ଡ ଦଳ: ଟମ ଲାଥାମ (ଅଧିନାୟକ), ଟମ ବ୍ଲଣ୍ଡେଲ (ୱିକେଟକିପର), ଡେଭନ କନୱେ, ଜାକବ ଡଫି, ମ୍ୟାଟ ଫିସର, ମ୍ୟାଟ ହେନରୀ, ଡାରିଲ ମିଚେଲ, ହେନରି ନିକୋଲ୍ସ, ୱିଲିୟମ ଓ’ରୌର୍କେ, ଅଜାଜ ପଟେଲ, ଗ୍ଲେନ ଫିଲିପ୍ସ, ରାଚିନ ରବିନ୍ଦ୍ର, ମିଚେଲ ସାଣ୍ଟନର, ନାଥନ ସ୍ମିଥ, ୱିଲ ୟଙ୍ଗ।source:argusnews.in