ଜେଲେନସ୍କିଙ୍କ ସହ ଭେଟ ପରେ ବଡ଼ ଘୋଷଣା କଲେ ଟ୍ରମ୍ପ: ସାରା ବିଶ୍ୱରେ ହଲଚଲ
ଓ୍ବାଶିଂଟନ,୧୯।୮: ୟୁକ୍ରେନ୍ରେ ଯୁଦ୍ଧ ବନ୍ଦ କରିବା ପାଇଁ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ଙ୍କ ସହ ତ୍ରିପାକ୍ଷିକ ଆଲୋଚନା ଲାଗି ସୋମବାର ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଏବଂ ୟୁକ୍ରେନ୍ ପ୍ରତିପକ୍ଷ ଭୋଲୋଡିମିର ଜେଲେନ୍ସ୍କି ଆଶାବାଦୀ ଥିବା କହିଛନ୍ତି। ହ୍ବାଇଟ୍ ହାଉସ୍ରେ ୟୁକ୍ରେନ୍ ଏବଂ ୟୁରୋପୀୟ ନେତାମାନଙ୍କ ସହ ଟ୍ରମ୍ପ୍ ଗୁରୁତ୍ୱପୂର୍ଣ୍ଣ ଆଲୋଚନା କରିଛନ୍ତି। ୟୁକ୍ରେନ୍ ପାଇଁ ୟୁରୋପୀୟ ସୁରକ୍ଷା ଗ୍ୟାରେଣ୍ଟିକୁ ଟ୍ରମ୍ପ୍ ସମର୍ଥନ କରିବେ ବୋଲି କହିଛନ୍ତି। ନାଟୋ ଭଳି ଏକ ସୁରକ୍ଷା ବଳ ଉପସ୍ଥିତ ରହିବ ବୋଲି ସେ କହିଥିବାବେଳେ ୟୁରୋପୀୟ ୟୁନିୟନ ନେତାମାନଙ୍କ ସହ ଏହା ଉପରେ ପୁଙ୍ଖାନୁପୁଙ୍ଖ ଆଲୋଚନା ହୋଇଛି। ଗତ ଶୁକ୍ରବାର ଟ୍ରମ୍ପ୍ ଆଲାସ୍କାରେ ପୁଟିନ୍ଙ୍କ ସହ ଆଲୋଚନା କରିବା ପରେ ଯୁଦ୍ଧ ବନ୍ଦ ନିଷ୍ପତ୍ତି ଜେଲେନ୍ସ୍କିଙ୍କ ଉପରେ ଛାଡ଼ିଥିଲେ। ଯଦି ସବୁକିଛି ଠିକ୍ଠାକ୍ ଚାଲେ ତେବେ ସମ୍ଭାବ୍ୟ ତ୍ରିପାକ୍ଷିକ ଆଲୋଚନା ହେବ। ଏଥିପାଇଁ ଆମେ ରୁଷିଆ ଓ ୟୁକ୍ରେନ୍ ସହ ଏକାଠି କାମ କରିବାକୁ ଯାଉଛୁ ବୋଲି ଟ୍ରମ୍ପ୍ କହିଛନ୍ତି। ଜେଲେନ୍ସ୍କି ମଧ୍ୟ ତ୍ରିପାକ୍ଷିକ ଆଲୋଚନା ପାଇଁ ପ୍ରସ୍ତୁତ ଥିବା ଜଣାଇଛନ୍ତି।
ରୁଷିଆ ଏବଂ ୟୁକ୍ରେନ ମଧ୍ୟରେ ଖୁବଶୀଘ୍ର ଏକ ଶାନ୍ତି ଚୁକ୍ତି ହୋଇପାରେ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ବିଷୟରେ ଏକ ବଡ଼ ସଙ୍କେତ ଦେଇଛନ୍ତି। ସେ ସୋମବାର ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କ ସହ ଏକ ବୈଠକ କରିଥିଲେ। ଟ୍ରମ୍ପ ଅନେକ ପ୍ରମୁଖ ୟୁରୋପୀୟ ନେତାଙ୍କୁ ମଧ୍ୟ ଭେଟିଥିଲେ। ଏହା ପରେ ସେ ଗୁରୁତ୍ୱପୂର୍ଣ୍ଣ ସୂଚନା ଶେୟାର କରିଥିଲେ। ଟ୍ରମ୍ପ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ ମାଧ୍ୟମରେ କହିଛନ୍ତି, ଜେଲେନସ୍କିଙ୍କ ସହ ମୋର ଭଲ ଆଲୋଚନା ହୋଇଛି। ସମସ୍ତ ୟୁରୋପୀୟ ଦେଶ ୟୁକ୍ରେନକୁ ସୁରକ୍ଷା ଗ୍ୟାରେଣ୍ଟି ଦେବେ। ମୁଁ ବହୁତ୍ ଖୁସି।
ଟ୍ରମ୍ପ ଟ୍ରୁଥ୍ ପୋଷ୍ଟ ମାଧ୍ୟମରେ କହିଛନ୍ତି,ମୁଁ ହ୍ବାଇଟ ହାଉସରେ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କ୍ି, ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନ, ଫିନଲାଣ୍ଡ ରାଷ୍ଟ୍ରପତି ଆଲେକଜାଣ୍ଡାର ଷ୍ଟବ, ଇଟାଲୀ ପ୍ରଧାନମନ୍ତ୍ରୀ ଜିଓର୍ଜିଆ ମେଲୋନି, ୟୁନାଇଟେଡ କିଙ୍ଗଡମ ପ୍ରଧାନମନ୍ତ୍ରୀ କାଇର ଷ୍ଟାରମର, ଜର୍ମାନ ଚାନ୍ସେଲର ଫ୍ରେଡ୍ରିଚ ମର୍ଜ, ୟୁରୋପୀୟ କମିଶନ ଅଧ୍ୟକ୍ଷ ଉର୍ସୁଲା ଭନ ଡେର୍ ଲେଏନ ଏବଂ ନାଟୋ ସେକ୍ରେଟାରୀ ଜେନେରାଲ ମାର୍କ ରୁଟଙ୍କ ସହ ଭଲ ଆଲୋଚନା କରିଛି।source:dharitri.com