ଟ୍ରମ୍ପଙ୍କ ନୂଆ H-1B ଭିସା ଯୋଜନା: “ଆମେରିକୀୟଙ୍କୁ ତାଲିମ ଦିଅ, ତା’ପରେ ଘରକୁ ଫେରିଯାଅ”

ନୂଆଦିଲ୍ଲୀ,୧୩। ୧୧: ଆମେରିକାର ଟ୍ରେଜେରୀ ସଚିବ ସ୍କଟ୍ ବେସେଣ୍ଟ ଘୋଷଣା କରିଛନ୍ତି ଯେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନୂଆ H-1B ଭିସା ନୀତିର ଉଦ୍ଦେଶ୍ୟ ହେଉଛି ଦକ୍ଷ ବିଦେଶୀ ବିଶେଷଜ୍ଞଙ୍କୁ ସାମୟିକ ଭାବରେ ଆଣି ଆମେରିକୀୟ ଶ୍ରମିକମାନଙ୍କୁ ତାଲିମ ଦେବା, ସେମାନଙ୍କୁ ବିସ୍ଥାପିତ କରିବା ନୁହେଁ।

ଫକ୍ସ ନ୍ୟୁଜକୁ ଦେଇଥିବା ଏକ ସାକ୍ଷାତକାରରେ ବେସେଣ୍ଟ୍ କହିଛନ୍ତି ଯେ ଏହି ଯୋଜନା ହେଉଛି ଏକ “ଜ୍ଞାନ ସ୍ଥାନାନ୍ତର” ରଣନୀତି। ଦଶନ୍ଧି ଧରି ବାହାରକୁ ଚାଲିଯାଇଥିବା ଆମେରିକାର ଉତ୍ପାଦନ, ଜାହାଜ ନିର୍ମାଣ ଏବଂ ସେମିକଣ୍ଡକ୍ଟର ଉଦ୍ୟୋଗକୁ ପୁନଃ ନିର୍ମାଣ କରିବା ଏହାର ଲକ୍ଷ୍ୟ।

ବେସେଣ୍ଟ୍ ପ୍ରଶାସନର ଏହି ଯୋଜନାକୁ ସାରାଂଶରେ କହିଛନ୍ତି ଯେ, “ଆମେରିକୀୟ ଶ୍ରମିକଙ୍କୁ ତାଲିମ ଦିଅ। ତା’ପରେ ଘରକୁ ଫେରିଯାଅ। ପରେ ଆମେରିକୀୟ ଶ୍ରମିକମାନେ ସମ୍ପୂର୍ଣ୍ଣ ଭାବେ ଦାୟିତ୍ୱ ନେବେ।”

ଆମେରିକୀୟମାନେ ବିସ୍ଥାପିତ ହେବା ଆଶଙ୍କାକୁ ଖଣ୍ଡନ କରି ବେସେଣ୍ଟ୍ କହିଛନ୍ତି ଯେ ବର୍ତ୍ତମାନ ଆମେରିକୀୟମାନେ ତୁରନ୍ତ ସେହି କାମ କରିପାରିବେ ନାହିଁ, କାରଣ ଦେଶରେ ବର୍ଷ ବର୍ଷ ଧରି ଜାହାଜ କିମ୍ବା ସେମିକଣ୍ଡକ୍ଟର ତିଆରି ହୋଇନାହିଁ। ତେଣୁ ବିଦେଶୀ ବିଶେଷଜ୍ଞଙ୍କ ଦ୍ୱାରା ତାଲିମ ଜରୁରୀ।

ବେସେଣ୍ଟ୍ ଏହା ମଧ୍ୟ ସୂଚନା ଦେଇଛନ୍ତି ଯେ ଟ୍ରମ୍ପ୍ ପ୍ରଶାସନ ବାର୍ଷିକ ୧,୦୦,୦୦୦ ଡଲାରରୁ କମ୍ ଆୟ କରୁଥିବା ପରିବାରମାନଙ୍କୁ ୨,୦୦୦ ଡଲାରର ଟାରିଫ୍ ରିବେଟ୍ ଦେବା ଉପରେ ଆଲୋଚନା କରୁଛି।

ବେସେଣ୍ଟ୍ ଆମେରିକୀୟ ଅର୍ଥନୀତି ପାଇଁ ୨୦୨୬କୁ ଏକ ସମ୍ଭାବ୍ୟ ବ୍ଲକବଷ୍ଟର ବର୍ଷ ବୋଲି ବର୍ଣ୍ଣନା କରିଛନ୍ତି।source:dhariti.com