ମଣିଷ ଓ ହରିଣଙ୍କ ଆଖିରେ ବାଘର ରଙ୍ଗ କାହିଁକି ଅଲଗା ଦିଶେ?
ନୂଆଦିଲ୍ଲୀ ୧୬/୧୧: ବାଘ କହିଲେ ଆଖି ଆଗକୁ ଚାଲିଆସେ ଏକ ଚମକୁଥିବା ହଳଦିଆରୁ ବାଦାମୀ ରଙ୍ଗର ଶରୀର, ତା' ଉପରେ କଳା କଳା ପଟି । ସାଧାରଣତଃ ଚାରି ପ୍ରକର ରଙ୍ଗର ବାଘ ଥାଆନ୍ତି ସେଗୁଡିକ ହେଉଛି | କମଳା ବାଘ (orange tiger ) ସବୁଠୁ ସାଧାରଣ ରଙ୍ଗ ,ଧଳା ବାଘ (white tiger ) ,ଗୋଲ୍ଡେନ୍ ଟାବି ବାଘ (Golden Tabby Tiger) ,କଳା ବାଘ (Pseudo-melanistic Tiger) ଏହାର କଳା ପଟି ଏତେ ଅଧିକ ଯେ ଶରୀରର ରଙ୍ଗ ବହୁତ କମ୍ ଦେଖାଯାଏ। ଓଡ଼ିଶାର ଶିମିଳିପାଳରେ ଏଭଳି ବାଘ ଦେଖିବାକୁ ମିଳନ୍ତି | ତେବେ ମଣିଷଙ୍କ ଆଖିରେ ବାଘର ଏହି ରଙ୍ଗ ଜଙ୍ଗଲର ସବୁଜ ପରିବେଶ ଭିତରେ ବେଶ୍ ସ୍ପଷ୍ଟ ଦେଖାଯାଏ। କିନ୍ତୁ ଯେଉଁ ଜଙ୍ଗଲରେ ବାଘ ଶିକାର କରେ, ସେଠାରେ ଏହି ରଙ୍ଗ ହିଁ ତା'ର ଛଦ୍ମବେଶ ପାଲଟିଯାଏ। ଆଶ୍ଚର୍ଯ୍ୟ ଲାଗିଲେ ବି ଏହା ପଛରେ ରହିଛି ଏକ ବୈଜ୍ଞାନିକ କାରଣ। ମଣିଷ ଓ ହରିଣଙ୍କ ଆଖିରେ ରଙ୍ଗର ଫରକ ରହିଛି | ମଣିଷଙ୍କ ଆଖିରେ ତିନି ପ୍ରକାରର କୋନ୍ କୋଷ ରହିଛି। ଏହା ସାହାଯ୍ୟରେ ଆମେ ଲାଲ୍, ସବୁଜ ଓ ନୀଳ ରଙ୍ଗର ପାର୍ଥକ୍ୟକୁ ଚିହ୍ନିପାରୁ। ଏହାକୁ ବୈଜ୍ଞାନିକ ଭାଷାରେ ଟ୍ରାଇକ୍ରୋମାଟିକ୍ ଭିଜନ୍ କୁହାଯାଏ। ଅନ୍ୟପଟେ ହରିଣଙ୍କ ଆଖିରେ ଦୁଇ ପ୍ରକାରର କୋନ୍ କୋଷ ଥାଏ। ଏହାକୁ ଡାଇକ୍ରୋମାଟିକ୍ ଭିଜନ୍ କୁହାଯାଏ। ଏହି କାରଣରୁ ସେମାନେ ମଣିଷଙ୍କ ଭଳି କମଳା ଓ ସବୁଜ ରଙ୍ଗ ମଧ୍ୟରେ ସ୍ପଷ୍ଟ ପାର୍ଥକ୍ୟ କରିପାରନ୍ତି ନାହିଁ। ଫଳରେ ମଣିଷଙ୍କୁ ଯେଉଁ ବାଘର ଶରୀର ଉଜ୍ଜ୍ୱଳ କମଳା ଦେଖାଯାଏ, ହରିଣଙ୍କ ଆଖିରେ ତାହା ସବୁଜ ପରିବେଶ ସହ ଅଧିକ ମିଶିଯାଏ। ଏହା ବାଘକୁ ଶିକାର ପାଖକୁ ନିରବରେ ପହଞ୍ଚିବାରେ ସାହାଯ୍ୟ କରିପାରେ।
ସ୍ତନ୍ୟପାୟୀ ପ୍ରାଣୀଙ୍କ ଲୋମରେ ସବୁଜ ରଙ୍ଗ ସୃଷ୍ଟି କରିବାର ପ୍ରାକୃତିକ ବ୍ୟବସ୍ଥା ନାହିଁ। ସେମାନଙ୍କ ଶରୀରରେ ଥିବା ମେଲାନିନ୍ ରଞ୍ଜକ ପଦାର୍ଥ କଳା, ବାଦାମୀ ଓ ହଳଦିଆ-ନାଲି ଭଳି ରଙ୍ଗ ସୃଷ୍ଟି କରେ। ତେଣୁ ସବୁଜ ଲୋମ ବିକଶିତ କରିବା ଅପେକ୍ଷା କମଳା ରଙ୍ଗର ଲୋମ ରହିବା ସ୍ତନ୍ୟପାୟୀ ପ୍ରାଣୀଙ୍କ ପାଇଁ ଅଧିକ ସ୍ୱାଭାବିକ। ଏହା ସହ ବାଘ ଦେହରେ ଥିବା କଳା ପଟି ମଧ୍ୟ ଏହାର ଛଦ୍ମବେଶରେ ସାହାଯ୍ୟ କରେ। ଜଙ୍ଗଲର ଗଛଲତା, ଘାସ ଓ ଆଲୋକଛାଇ ଭିତରେ ଏହି ପଟି ବାଘର ଶରୀରର ଆକୃତିକୁ ଠିକ୍ ଭାବେ ଚିହ୍ନିବା କଷ୍ଟକର କରିଦିଏ। ୨୦୧୯ ମସିହାରେ Journal of the Royal Society Interface ରେ ପ୍ରକାଶିତ ଏକ ଗବେଷଣାରେ ବାଘର ରଙ୍ଗ ଓ ଛଦ୍ମବେଶକୁ ନେଇ ଅଧ୍ୟୟନ କରାଯାଇଥିଲା। ଗବେଷକମାନେ ହଳଦିଆରୁ ବାଦାମୀ ରଙ୍ଗର ବାଘ ଡାଇକ୍ରୋମାଟିକ୍ ଦୃଷ୍ଟି ଥିବା ପ୍ରାଣୀଙ୍କ ପାଇଁ କିପରି ଭଲ ଛଦ୍ମବେଶ ହୋଇପାରେ, ତାହା ଦର୍ଶାଇଥିଲେ।ଏହି ଗବେଷଣା ଅନୁସାରେ, ଶିକାର ଜୀବଙ୍କ ଦୃଷ୍ଟିଶକ୍ତିକୁ ଧ୍ୟାନରେ ରଖିଲେ ବାଘର ହଳଦିଆରୁ ବାଦାମୀ ରଙ୍ଗ ଏକ ପ୍ରଭାବଶାଳୀ ପ୍ରାକୃତିକ ଛଦ୍ମବେଶ। ଅର୍ଥାତ୍ ମଣିଷଙ୍କୁ ଯେଉଁ ରଙ୍ଗ ଅତ୍ୟନ୍ତ ସ୍ପଷ୍ଟ ଦେଖାଯାଏ, ତାହା ଅନ୍ୟ ପ୍ରାଣୀଙ୍କ ପାଇଁ ସେତେଟା ସ୍ପଷ୍ଟ ନ ହୋଇପାରେ। ଏହା ହେଉଛି ଏକ ଅଦ୍ଭୁତ ପ୍ରାକୃତିକ ସୃଷ୍ଟି , ଯେଉଁଠି ଆମ ଆଖିକୁ ସ୍ପଷ୍ଟ ଦେଖାଯାଉଥିବା ବାଘ ଜଙ୍ଗଲରେ ନିଜ ଶିକାର ପାଇଁ ଲୁଚି ରହିପାରେ।
source:prameya news


