ବଡ଼ ରେକର୍ଡ କଲେ ବୁମ୍‌ରା: ଶ୍ରୀନାଥଙ୍କୁ ପଛରେ ପକାଇ ଟେଷ୍ଟରେ ହାସଲ କଲେ…

ଖେଳ

ନୂଆଦିଲ୍ଲୀ, ୧୯।୧୧:ଟେଷ୍ଟ କ୍ରିକେଟ୍‌ରେ ପୁଣି ନିଜ ଦମ ଦେଖାଇଛନ୍ତି ଭାରତୀୟ ଦ୍ରୁତ ବୋଲର ଜଶପ୍ରୀତ ବୁମ୍‌ରା। ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ପ୍ରଥମ ଟେଷ୍ଟ ଆରମ୍ଭ ହେବା ମାତ୍ରେ ପ୍ରଥମ ଓଭରରେ ଉଇକେଟ ନେଇ ନିଜ ଘାତକ ବୋଲିଂର ପରିଚୟ ଦେଇଛନ୍ତି। ଏହା ସହିତ ଟେଷ୍ଟ କ୍ରିକେଟ୍‌ରେ ଭାରତ ପାଇଁ ସର୍ବାଧିକ ଉଇକେଟ ନେଇଥିବା ବୋଲରଙ୍କ ତାଲିକାରେ ଦଶମ ସ୍ଥାନକୁ ଉଠିଛନ୍ତି ବୁମ୍‌ରା। ଏହି କ୍ରମରେ ସେ ପୂର୍ବତନ ଦ୍ରୁତ ବୋଲର ଜବଗଲ ଶ୍ରୀନାଥଙ୍କୁ ପଛରେ ପକାଇଛନ୍ତି।

ଭାରତ-ନ୍ୟୁଜିଲାଣ୍ଡ ପ୍ରଥମ ଟେଷ୍ଟରେ ଭାରତୀୟ ଅଧିନାୟକ ଶୁବମନ ଗିଲ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ଅଧିନାୟକଙ୍କ ଏହି ନିଷ୍ପତ୍ତିକୁ ସଠିକ ପ୍ରମାଣିତ କରିଥିଲେ ବୁମ୍‌ରା। ମ୍ୟାଚ୍‌ର ତୃତୀୟ ବଲ୍‌ରେ ନ୍ୟୁଜିଲାଣ୍ଡ ଅଧିନାୟକ ଟମ ଲାଥାମଙ୍କୁ ଶୂନ ରନ୍‌ରେ ଆଉଟ କରି ଭାରତକୁ ପ୍ରଥମ ସଫଳତା ଦେଇଥିଲେ। ଏହାପରେ ମଧ୍ୟ ବୁମ୍‌ରାଙ୍କ ବୋଲିଂର ଧାର ଜାରି ରହିଥିଲା। ଟି-ବ୍ରେକ ସୁଦ୍ଧା ନ୍ୟୁଜିଲାଣ୍ଡ ଦଳ ୧୪୦ ରନ୍‌ଷର ୫ଟି ଉଇକେଟ ହରାଇଥିଲା। ଏକଦା ମାତ୍ର ୭୦ ରନ୍‌ରେ ୫ଟି ଉଇକେଟ ହରାଇ ସଙ୍କଟରେ ପଡ଼ିଥିବା ନ୍ୟୁଜିଲାଣ୍ଡକୁ ହେନରୀ ନିକୋଲ୍ସ ଓ ଗ୍ଲେନ ଫିଲିପ୍ସ ସମ୍ଭାଳିବାକୁ ଚେଷ୍ଟା କରିଥିଲେ। ଟି-ବ୍ରେକ ପର୍ଯ୍ୟନ୍ତ ବୁମ୍‌ରା ୧୨ ଓଭର ବୋଲିଂ କରି ୫ଟି ମେଡେନ ଓଭର ସହ ମାତ୍ର ୩୧ ରନ ବ୍ୟୟ କରି ୩ଟି ଉଇକେଟ ଅକ୍ତିଆର କରିଥିଲେ। ଏହି ୩ଟି ଉଇକେଟ ସହ ତାଙ୍କ ଟେଷ୍ଟ କ୍ୟାରିୟରର ମୋଟ ଉଇକେଟ ସଂଖ୍ୟା ୨୩୭ରେ ପହଞ୍ଚିଛି।

ଏହା ସହିତ ଭାରତର ପୂର୍ବତନ ଦ୍ରୁତ ବୋଲର ଜବଗଲ ଶ୍ରୀନାଥଙ୍କ ୨୩୬ ଉଇକେଟରେ ରେକର୍ଡକୁ ଅତିକ୍ରମ କରିଛନ୍ତି ବୁମ୍‌ରା। ଶ୍ରୀନାଥ ୬୭ଟି ଟେଷ୍ଟ ମ୍ୟାଚ ଖେଳି ଏହି ସଫଳତା ହାସଲ କରିଥିଲେ। ତେବେ ବୁମ୍‌ରା ତାଙ୍କୁ ପଛରେ ପକାଇ ଭାରତ ପାଇଁ ଟେଷ୍ଟରେ ସର୍ବାଧିକ ଉଇକେଟ ହାସଲକାରୀଙ୍କ ତାଲିକାର ଦଶମ ସ୍ଥାନ ଅଧିକାର କରିଛନ୍ତି। ଭାରତ ପାଇଁ ଟେଷ୍ଟ କ୍ରିକେଟ୍‌ରେ ସର୍ବାଧିକ ଉଇକେଟ ନେବାର ରେକର୍ଡ ପୂର୍ବତନ ଲେଗ ସ୍ପିନର ଅନିଲ କୁମ୍ବଲେଙ୍କ ନାମରେ ରହିଛି। ସେ ୧୩୨ଟି ଟେଷ୍ଟ ମ୍ୟାଚ ଖେଳି ୬୧୯ଟି ଉଇକେଟ ନେଇଛନ୍ତି। ଦ୍ୱିତୀୟ ସ୍ଥାନରେ ରହିଛନ୍ତି ରବିଚନ୍ଦ୍ରନ ଅଶ୍ୱିନ। ସେ ୧୦୬ଟି ଟେଷ୍ଟରୁ ୫୩୭ଟି ଉଇକେଟ ହାସଲ କରିଛନ୍ତି।

ସେହିପରି ଭାରତ ପାଇଁ ସର୍ବାଧିକ ଟେଷ୍ଟ ଉଇକେଟ ନେଇଥିବା ଦ୍ରୁତ ବୋଲର ହେଉଛନ୍ତି କପିଲ ଦେବ। ସେ ୧୩୧ଟି ଟେଷ୍ଟ ମ୍ୟାଚ ଖେଳି ୪୩୪ଟି ଉଇକେଟ ନେଇଥିଲେ। ବୁମ୍‌ରାଙ୍କ ଏହି ଐତିହାସିକ ସଫଳତା ଭାରତୀୟ କ୍ରିକେଟ ପାଇଁ ଆଉ ଏକ ଗୌରବର ମୁହୂର୍ତ୍ତ।

source:dharitri news


Related News