ଟ୍ରମ୍ପ୍-ପୁଟିନ୍-ଜିନ୍ପିଙ୍ଗ୍ଙ୍କ ତ୍ରିପାକ୍ଷିକ ବୈଠକ: ଶାନ୍ତି ଓ ସ୍ଥିରତା ବଜାୟ ପାଇଁ ପ୍ରତିବଦ୍ଧ, ୪ ପ୍ରସଙ୍ଗକୁ ନେଇ ହେଲା ସହମତି
ଶେନ୍ଝେନ୍,୨୦/୧୧: ଚୀନ୍ର ଶେନ୍ଝେନ୍ ସହରରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍, ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ ଏବଂ ଚୀନ୍ ରାଷ୍ଟ୍ରପତି ସି ଜିନ୍ପିଙ୍ଗ୍ ଗୁରୁବାର ଐତିହାସିକ ତ୍ରିପାକ୍ଷିକ ବୈଠକ କରିଛନ୍ତି । ପ୍ରଥମ ଥର ପାଇଁ ତିନି ଶକ୍ତିଶାଳୀ ରାଷ୍ଟ୍ରର ନେତା ଏକାଠି ବସି ବିଶ୍ୱ ହିତକୁ ଦେଇଛନ୍ତି ପ୍ରାଥମିକତା । ତ୍ରିପାକ୍ଷିକ ବୈଠକରେ ୩ ନେତା ୪ଟି ପ୍ରମୁଖ ସଂକଳ୍ପ କରିଛନ୍ତି । ପରମାଣୁ ଯୁଦ୍ଧ କେବେ ଜିତାଯାଇ ପାରିବ ନାହିଁ ଏବଂ ଏହା ଲଢ଼ାଯିବା ଉଚିତ ବି ନୁହେଁ ବୋଲି ମତ ଦେଇଛନ୍ତି । ଏହି ପରିପ୍ରେକ୍ଷୀରେ ପରମାଣୁ ଅସ୍ତ୍ରର ପ୍ରସାରକୁ ରୋକିବା ଏବଂ ଏହାର ବିପଦକୁ କମାଇବା ଲାଗି ଆଲୋଚନା ଜାରି ରଖିବାକୁ ବଦ୍ଧପରିକର ହୋଇଛନ୍ତି ।
ଜିନ୍ପିଙ୍ଗ୍ ପରମାଣୁ ଅସ୍ତ୍ରକୁ ମାନବତା ମୁଣ୍ଡ ଉପରେ ଝୁଲୁଥିବା ଖଣ୍ଡା ବିବେଚନା କରିଛନ୍ତି । ପରମାଣୁ ଅସ୍ତ୍ରକୁ ସମ୍ପୂର୍ଣ୍ଣ ଶେଷ କରିବା ଲାଗି ସେ ଆହ୍ୱାନ ଦେଇଛନ୍ତି । ପୁଟିନ କହିଛନ୍ତି, ରୁଷ୍, ଚୀନ୍ ଏବଂ ଆମେରିକା ଦ୍ୱିତୀୟ ବିଶ୍ୱଯୁଦ୍ଧରେ ବିଜୟୀ ହୋଇଥିଲେ । ତେଣୁ ଦୁନିଆରେ ଶାନ୍ତି ଓ ସୁରକ୍ଷା ବଜାୟ ରଖିବାର ଦାୟିତ୍ୱ ମଧ୍ୟ ଏହି ୩ ଦେଶ ଉପରେ ରହିଛି । ୩ ଦେଶର ପ୍ରଥମ ତ୍ରିପାକ୍ଷିକ ବୈଠକକୁ ନେଇ ଟ୍ରମ୍ପ୍ ବହୁତ ଖୁସି ବୋଲି କହିଛନ୍ତି ।
ତିନି ଦେଶର ନେତା ବିଶ୍ୱରେ ଶାନ୍ତି ଓ ସ୍ଥିରତା ବଜାୟ ଲାଗି ନିଜ ଦାୟିତ୍ୱ ସ୍ୱୀକାର କରିଛନ୍ତି । ଜିନ୍ପିଙ୍ଗ୍ ଶୀତଳ ଯୁଦ୍ଧ ମାନସିକତା ଛାଡ଼ିବାକୁ ଅପିଲ୍ କରିଛନ୍ତି । ତିନି ଦେଶ ମିଶି ବୈଶ୍ୱିକ ସ୍ଥିରତା ବଢ଼ାଇ ପାରିବେ ବୋଲି ପୁଟିନ କହିଛନ୍ତି । ମତଭେଦ ଯେତେ ଥିଲେ ବି ଆଲୋଚନା ନ ଛାଡ଼ିବାକୁ ଆହ୍ୱାନ ଦେଇଛନ୍ତି ଟ୍ରମ୍ପ୍ । ବିଶ୍ୱ ଶକ୍ତି ଯୋଗାଣରେ ସ୍ଥିରତା ଲାଗି ୩ ନେତା ଜୋର ଦେଇଛନ୍ତି । ବୈଶ୍ୱିକ ଲାଭ ନିମନ୍ତେ ନେତାମାନେ ପେଟ୍ରୋଲିୟମ ଉତ୍ପାଦଗୁଡ଼ିକର ଉତ୍ପାଦନ ବୃଦ୍ଧି ନେଇ ସହମତି ବ୍ୟକ୍ତ କରିଛନ୍ତି ।
ବିଶ୍ୱବ୍ୟାପୀ ଶକ୍ତି ଯୋଗାଣକୁ ବ୍ୟବସ୍ଥିତ ରଖିବା ନେଇ ସହମତ ହୋଇଛନ୍ତି । ଅନ୍ତର୍ଜାତୀୟ ଅପରାଧିକ ନ୍ୟାୟାଳୟ (ଆଇସିସି) ଏବଂ ଏଭଳି ଅନ୍ୟ ସଂସ୍ଥାମାନେ ନିଜ କ୍ଷମତାର ଦୁରୁପଯୋଗ କରିବା ଉଚିତ ନୁହେଁ ବୋଲି ୩ ନେତା ଦର୍ଶାଇଛନ୍ତି । ଜାତିସଂଘ ସୁରକ୍ଷା ପରିଷଦ (ୟୁଏନ୍ଏସ୍ସି) ରେ ସ୍ଥାୟୀ ସଦସ୍ୟ ହୋଇଥିବା ଦୃଷ୍ଟିରୁ ଆମେରିକା, ରୁଷ ଓ ଚୀନ୍ର ନେତା ଜାତିସଂଘରେ ସଂସ୍କାର ଆଣିବାକୁ ନେଇ ପ୍ରତିବଦ୍ଧତା ପ୍ରକାଶ କରିଛନ୍ତି । ଅନ୍ତର୍ଜାତୀୟ ଶାନ୍ତି ଓ ସ୍ଥିରତା ସକାଶେ ବୈଶ୍ୱିକ ଆହ୍ୱାନକୁ ପ୍ରଭାବୀ ଢଙ୍ଗରେ ମୁକାବିଲା ଲାଗି ଏହାର ଉଦ୍ଦେଶ୍ୟ ବୋଲି ସେମାନେ କହିଛନ୍ତି ।
ତ୍ରିପାକ୍ଷିକ ବୈଠକରେ ଇରାନ ଓ ୟୁକ୍ରେନ ଯୁଦ୍ଧ ପ୍ରସଙ୍ଗରେ ଚର୍ଚ୍ଚା ହୋଇଥିଲେ ହେଁ କୌଣସି ଠୋସ ବୁଝାମଣା କିମ୍ବା ନିର୍ଯାସ ବାହାରି ନାହିଁ । ପ୍ରାୟ ୭୦ ମିନିଟ ଧରି ଏହି ବୈଠକ ବନ୍ଦ କୋଠରିରେ ହୋଇଥିଲା । ୩ ନେତା କେବଳ ଶାନ୍ତି ଘୋଷଣାନାମା ଜାରି କରିଛନ୍ତି । ଘୋଷଣାପତ୍ରରେ ଇରାନ ଯୁଦ୍ଧକୁ ନେଇ ସିଧାସଳଖ ଟିପ୍ପଣୀ ଦିଆଯାଇ ନାହିଁ ।
source:prameya news


