Winter Diet Tips : ଶୀତଦିନେ ଗୁଡ଼ ନା ଖଜୁରୀ, ଆପଣଙ୍କ ସ୍ୱାସ୍ଥ୍ୟ ପାଇଁ କେଉଁଟି ଅଧିକ ଭଲ ?
ଭୁବନେଶ୍ଵର, ୨୦/୧୧ : ଶୀତଦିନ ଆସିଲେ ଘରେ ଗୁଡ଼, ଖଜୁରୀ ଓ ଏଥିରୁ ତିଆରି ପିଠାପଣାର ବ୍ୟବହାର ବଢ଼ିଯାଏ । ଗୁଡ଼କୁ ଶକ୍ତିଦାୟକ ଓ ଖଜୁରୀକୁ ପୋଷକତତ୍ତ୍ୱରେ ଭରପୂର ।
ଗୁଡ଼ ଓ ଖଜୁରୀର ଉତ୍ସ ଓ ପୋଷକ ଗୁଣ
ଗୁଡ଼ ସାଧାରଣତଃ ଆଖୁରସ କିମ୍ବା ତାଳରସକୁ ଫୁଟାଇ ଘନୀଭୂତ କରି ତିଆରି କରାଯାଏ । ଏହାର ମୁଖ୍ୟ ଅଂଶ ହେଉଛି ଶର୍କରା, ବିଶେଷତଃ ସୁକ୍ରୋଜ୍: ଏଥିରେ ଗ୍ଲୁକୋଜ୍ ଓ ଫ୍ରୁକ୍ଟୋଜ୍ ମଧ୍ୟ ଥାଇପାରେ । ପ୍ରସ୍ତୁତି ପ୍ରଣାଳୀ ଓ ଉତ୍ସ ଅନୁସାରେ ଅଳ୍ପ ପରିମାଣରେ ଲୌହ, କ୍ୟାଲସିୟମ୍, ପୋଟାସିୟମ୍ ଓ ଅନ୍ୟ ଖଣିଜ ପଦାର୍ଥ ରହିପାରେ । ତେଣୁ ଗୁଡ଼କୁ ଖଣିଜ ପଦାର୍ଥର ମୁଖ୍ୟ ଉତ୍ସ ଭାବେ ଧରିବା ଠିକ୍ ନୁହେଁ । ଖଜୁରୀ ଏକ ଫଳ । ତାଜା ଖଜୁରୀ ଓ ଶୁଖିଲା ଖଜୁରୀରେ ପାଣିର ପରିମାଣ ଭିନ୍ନ ଥାଏ । ଶୁଖିଲା ଖଜୁରୀରେ ସମାନ ଓଜନରେ ଶର୍କରା ଓ କ୍ୟାଲୋରି ଅଧିକ ଘନୀଭୂତ ହୋଇଥାଏ । ଖଜୁରୀରେ ପ୍ରାକୃତିକ ଶର୍କରା ସହ ଖାଦ୍ୟ ଫାଇବର, ପୋଟାସିୟମ୍, ମ୍ୟାଗ୍ନେସିୟମ୍ ଓ କିଛି ଅନ୍ୟ ସୂକ୍ଷ୍ମ ପୋଷକତତ୍ତ୍ୱ ରହିଥାଏ ।
ତୁରନ୍ତ ଶକ୍ତି କିଏ ଦିଏ ?
ଗୁଡ଼ ଓ ଖଜୁରୀରେ କାର୍ବୋହାଇଡ୍ରେଟ୍ ଥିବାରୁ ଶରୀରକୁ ଶକ୍ତି ଯୋଗାଇଥାଏ । ଗୁଡ଼ରେ ଶର୍କରା ଅଧିକ ଘନୀଭୂତ ଥିବାରୁ ଅଳ୍ପ ପରିମାଣରେ ଶକ୍ତି ମିଳେ । ଖଜୁରୀରେ ମଧ୍ୟ ଗ୍ଲୁକୋଜ୍ ଓ ଫ୍ରୁକ୍ଟୋଜ୍ ଭଳି ପ୍ରାକୃତିକ ଶର୍କରା ରହିଛି । ଖଜୁରୀକୁ ଅସୀମିତ ଭାବେ ଖାଇପାରିବା ଭାବିବା ଭୁଲ, କାରଣ ଏହା କ୍ୟାଲୋରି ଓ ଶର୍କରାରେ ଭରା । ଗୁଡ଼ରେ କିଛି ଲୌହ ଥାଇପାରେ, କିନ୍ତୁ ଏହାର ପରିମାଣ ଓ ଶରୀର ଦ୍ୱାରା ଶୋଷଣ ଉଭୟ ନିଶ୍ଚିତ ନୁହେଁ । ଖଜୁରୀରେ ମଧ୍ୟ କିଛି ଲୌହ ରହେ, କିନ୍ତୁ ରକ୍ତହୀନତା ଚିକିତ୍ସା ପାଇଁ ଯଥେଷ୍ଟ ନୁହେଁ । ଲୌହ ଅଭାବଜନିତ ରକ୍ତହୀନତା ଥିଲେ ହିମୋଗ୍ଲୋବିନ୍ ଓ ଆବଶ୍ୟକ ପରୀକ୍ଷା କରି ଡାକ୍ତରଙ୍କ ପରାମର୍ଶ ଅନୁସାରେ ଲୌହ ଔଷଧ ଓ ଉପଯୁକ୍ତ ଖାଦ୍ୟ ନେବା ଦରକାର । ଗୁଡ଼ ଖାଇଲେ ରକ୍ତ ବଢ଼ିଯାଏ ବୋଲି ଭାବିବା ବୈଜ୍ଞାନିକ ଭାବେ ଠିକ୍ ନୁହେଁ । ଗୁଡ଼କୁ ଅନେକ ଧଳା ଚିନିର ପ୍ରାକୃତିକ ବିକଳ୍ପ କୁହାଯାଏ । କିନ୍ତୁ ଗୁଡ଼ ମଧ୍ୟ ଶର୍କରା । ଏହା ଖାଇଲେ ରକ୍ତରେ ଗ୍ଲୁକୋଜ୍ ବଢ଼ିପାରେ । ତେଣୁ ମଧୁମେହ ରୋଗୀଙ୍କ ପାଇଁ ଗୁଡ଼ ସମ୍ପୂର୍ଣ୍ଣ ସୁରକ୍ଷିତ ବା ଚିନିଠାରୁ ନିଶ୍ଚିତ ଭଲ, ଏପରି ଦାବି କରିବା ଉଚିତ୍ ନୁହେଁ । ଓଜନ ନିୟନ୍ତ୍ରଣ କରୁଥିବା ବ୍ୟକ୍ତି ଗୁଡ଼ ଓ ଖଜୁରୀ, ଦୁହିଁର ପରିମାଣ ଉପରେ ଧ୍ୟାନ ଦିଅନ୍ତୁ ।
source:prameya news


